Այսօր հաջողությամբ տեղի ունեցավ իմ նախաձեռնությամբ ստեղծված և Տիգրան Խաչատրյանի գլխավորությամբ աշխատող միջգերատեսչական աշխատանքային խմբի առաջին նիստը։
Նիստի ընթացքում մանրամասն քննարկվեցին Երևան քաղաքում մթնոլորտային օդի աղտոտվածության խնդիրները և դրանց լուծման ուղղությամբ առաջարկվող միջոցառումները։
Նիստի մասնակիցներին ներկայացվեցին վերջին երեք տարիների ընթացքում իրականացված մթնոլորտային օդի որակի մոնիթորինգի արդյունքները։ Այս վերլուծության հիման վրա առանձնացվեցին և քննարկվեցին օդի որակի վրա ազդեցություն ունեցող հիմնական խնդիրները։
Միջգերատեսչական խումբը վերլուծեց նաև օդի որակի գնահատման ոլորտում գործող օրենսդրական կարգավորումները և դրանց կիրառման մեխանիզմները։ Քննարկվեցին արդեն իրականացված և ընթացիկ վերահսկողական աշխատանքների արդյունքները, ներառյալ արձանագրված իրավախախտումները և դրանց կապակցությամբ կիրառված վարչական միջոցները։
Հատկանշական էր նիստի օրակարգի այն մասը, որտեղ քննարկվեց Երևան քաղաքում օդի որակի վրա առավել բացասական ազդեցություն ունեցող աղբյուրների գույքագրումը։ Քննարկվեցին նաև աղտոտվածության նվազեցման համար առաջարկվող կոնկրետ միջոցառումների տարբերակները։
Ավտոտրանսպորտային միջոցներից արտանետումների կանխարգելման ոլորտում մանրամասն քննարկվեցին առկա խնդիրները և դրանց լուծման հնարավոր ուղիները։ Շատ կարևոր թեմա դարձավ ավտոտրանսպորտային միջոցների տեխնիկական զննության գործընթացի բարելավումը։ Այս համատեքստում քննարկվեցին առաջարկություններ, որոնք ենթադրում են շարժիչի արտանետումների չափման գործընթացի ամբողջական թվայնացումը, զննության կայանների տեխնիկական վերազինումը և վերահսկողության համար էլեկտրոնային գործիքների կիրառումը։
Նիստի ավարտին կարևորեցի միջգերատեսչական համագործակցության շարունակականությունը և տվեցի համապատասխան հանձնարարականներ՝ ապահովելու համար, որ այս համակարգված ջանքերը հանգեցնեն կոնկրետ և տեսանելի արդյունքների մեր քաղաքի բնակիչների առողջության և բարեկեցության համար։
