Իմ հարցազրուցի ընթացքում ես անդրադարձել մի քանի կարևոր հարցերի՝ կապված ռազմական գործողությունների ընթացքի հետ։
Մինչև ռազմական գործողությունների սկսվելը, այդ թվում՝ բլոկադայի ժամանակ, երբ որոշ բեռներ տեղափոխվում էին ուղղաթիռներով, ադրբեջանական կողմը մանրակրկիտ զննման էր ենթարկում դրանք։ Բացառություն չէր սեպտեմբերի 25-ին տեղի ունեցած պաշտպանության բանակի զորամասերից մեկում պայթյունի հետևանքով զոհերի ու վիրավորների տեղափոխման պրոցեսը։
Ըստ իմ տեղեկությունների՝ ողջ ընթացքում Ադրբեջանական ներկայացուցիչները ստուգում էին ուղղաթիռները, նույնիսկ քանդում էին մարդկանց երեսին կապած բինտերը՝ համոզվելու, որ այլ մարդ չի տեղափոխվում։
Անդրադառնալով Ալիևի հայտարարած համաներմանը և հնարավորությանը, որ այն կվերաբերի նաև Արցախի ղեկավարությանը, ես նշել եմ, որ կոնկրետ տեղեկություններ չունեմ գերեվարված անձանց համաներմանն ընդգրկվելու մասին։
Իմ կարծիքով, տրամաբանական է, որ չեն կարող Ադրբեջանում դատվել հայազգի մարդիկ՝ այդ թվում Արցախի ռազմաքաղաքական ղեկավարությունը, և մենք խոսենք խաղաղության պրոցեսի մասին։ Այս հարցը պետք է անպայման քննարկվի, և մարդիկ պետք է ազատ արձակվեն։ Իրենց ազատ արձակելուց հետո մենք բավականին հարցերի պատասխաններ կստանանք իրենց կողմից։
