Անկարայում տեղի ունեցած հանդիպման ընթացքում Թուրքիայի ներքին գործերի նախարար Ալի Յերլիքայայի հետ քննարկվել են փոքրամասնությունների հիվանդանոցային հիմնադրամների խորհուրդների ընտրությունների անցկացման կանոնակարգերին առնչվող հարցերը։
Պոլսի (Ստամբուլ) հայոց պատրիարք Սահակ արքեպիսկոպոս Մաշալյանը նախարարին ներկայացրել է իր մտահոգությունը՝ կապված հիվանդանոցային հիմնադրամների ընտրությունների հետաձգման հետ։ Նա նշել է, որ կարևոր է, որ փոքրամասնությունները լիարժեք ներկայացված լինեն և նրանց կարծիքները հաշվի առնվեն նոր սահմանադրության մշակման գործընթացում։
Ալի Յերլիքայան իր հերթին հայտնել է, որ աշխատանքները այս հարցերի շուրջ կիրականացվեն զգայունությամբ։
Հիշեցնենք, որ 2022 թվականին, 9 տարվա ընդմիջումից հետո, փոքրամասնությունների հիմնադրամները կարողացել են անցկացնել ընտրություններ՝ Թուրքիայի պաշտոնական տեղեկագրում հրապարակված կանոնակարգի շնորհիվ։ Սակայն այդ կանոնակարգը բացառել էր հիվանդանոցային հիմնադրամների ընտրությունները՝ նշելով, որ դրանց համար 2023 թվականին կհրապարակվի նոր կանոնակարգ։
Այնուամենայնիվ, 2023 թվականից հետո նոր կանոնադրությունը դեռևս հրապարակված չէ։ Անցել է երկու տարի, սակայն հստակ բացատրություն տրված չէ, թե ինչու է հետաձգվել կանոնակարգի հրապարակումը։ Անկարայից պաշտոնական մարմինները վերջին երկու տարիների ընթացքում տրամադրել են միայն մեկ պատասխան՝ «նախապատրաստական աշխատանքները շարունակվում են»։
