Այսօր, իմ նախաձեռնությամբ, տեղի է ունեցել հարկային վարչարարության արդյունքում քրեական վարույթների նախաձեռնման պրակտիկայի վերաբերյալ համապարփակ քննարկում։ Հանդիպման նպատակն էր վերլուծել և գտնել այս հարցի կարգավորման հնարավոր ուղիներ։
Քննարկմանը մասնակցել են Պետական եկամուտների կոմիտեի (ՊԵԿ) և այլ շահագրգիռ պետական գերատեսչությունների ներկայացուցիչներ, ինչպես նաև տնտեսավարողներին ներկայացնող հեղինակավոր գործարար միությունների ղեկավարները։
Հիմնական ուշադրության կենտրոնում հարցի այն ասպեկտը էր, թե ինչպես է հարկային վարչարարության ընթացքում, ՊԵԿ-ի հաղորդումների հիման վրա, լրացուցիչ հարկային պարտավորությունների առաջադրումը ազդում տնտեսական միջավայրի վրա։ Գործարար միությունների ներկայացուցիչները նշել են, որ այս պրակտիկայի հետևանքով որոշ տնտեսավարողներ, խուսափելու համար հնարավոր քրեական պատասխանատվությունից, նախընտրում են չվիճարկել առաջադրված պարտավորությունները, ինչը կարող է հանգեցնել անարդար և անհիմն հարկային բեռի աճի։
Պատասխանատու գերատեսչությունները ներկայացրել են իրենց կողմից արդեն իրականացված և ընթացիկ աշխատանքները՝ ուղղված այս խնդրի լուծմանը։ Բացի այդ, առաջարկվել են մի շարք լրացուցիչ միջոցներ, որոնք կարող են ապահովել ավելի հավասարակշռված մոտեցում։ Այդ առաջարկներից էին՝
Լրացուցիչ պարտավորությունների առաջադրման շեմի փոփոխությունը՝ ավելի բարձր աստիճանի ռիսկային գործունեության ցուցանիշների հիմքով։
Հարկային ստուգման ընթացքի ողջամիտ ժամանակահատվածի սահմանումը՝ ապահովելով տնտեսավարողների գործունեության կայունությունը։
Հաղորդում ներկայացնելու պարտադիր պայմանի որպես հարկային պարտավորություններից խուսափելու հանցակազմի առկայության պահանջի սահմանումը՝ ապահովելով, որ քրեական հետապնդումը սկսվի միայն իսկապես հիմնավորված դեպքերում։
Ես կարևորել եմ, որ ապագա լուծումները պետք է ոչ միայն ամրապնդեն հարկային կարգապահությունը և պետական եկամուտների հավաքագրումը, այլև միաժամանակ ապահովեն գործարարների իրավունքների պաշտպանության լիարժեք իրացումը՝ խթանելով առողջ և կայուն տնտեսություն։
Հանդիպման արդյունքում ձեռք է բերվել պայմանավորվածություն՝ շարունակելու այս հարցի վերաբերյալ համագործակցությունը։ Մենք պլանավորում ենք շարունակել քննարկումները՝ 2026 թվականի սկզբին դրանք ամփոփելու և հետագա քայլերը համաձայնեցնելու նպատակով։ Այս համատեղ ջանքերը, ես համոզված եմ, կնպաստեն ավելի արդար և արդյունավետ հարկային համակարգի ստեղծմանը։
